اسماعیلی ہاسٹل چترال

شیرولی خان اسیرؔ

عام طور پرطلبہ کے اقامتی اداروں کی بات نہیں ہوتی جبکہ جس ادارے یعنی سکول ،کالج یا یونیورسٹی میں وہ پڑھ چکے ہوتے ہیں ان کو یاد کیا جاتا ہےحالانکہ ان اقامت گاہوں کا اتنا ہی کردار ہوتا ہے جتنا ان تعلیمی اداروں کا ہوتا ہے۔ ہر طالب علم کے گھر کے نزدیک اسکول، کالج یا یونیورسٹی نہیں ہوتی۔ ایسے طلبہ کے لیے جاۓ رہائش کی بھی اتنے ہی ضرورت ہوتی ہے جتنی تعلیمی ادارے کی۔ اسلامیہ کالج پشاور کے ساتھ رحیم شاہ وارڈ، اورٴینٹل ہوسٹل، چیمسفورڈ ، ہارڈنگ، عثمانیہ ہوسٹل نہ ہوتے تو چترال، سوات، دیر قبائیلی علاقوں غرض پشاور سے باہر کسی بھی طالب علم کو ااسلامیہ کالج پشاور میں پڑھنا نصیب نہ ہوتا۔

جس طرح سابق صوبہ سرحد میں اسلامیہ کالج کے ہوسٹلوں کی اہمیت تھی اور جو آج بھی ہے، بالکل اسی طرح چترال میں اسماعیلی ہوسٹل اور سٹیٹ بورڈنگ ہاوس چترال کی اہمیت تھی۔ 1962 تک اپر چترال یعنی سابق ضلع مستوج میں ایک ہائی اسکول نہیں تھا۔ 1962 میں سٹیٹ مڈل اسکول بونی کو ہائی کا درجہ دیا گیا۔ اگر متذکرہ دو رہائیشی سہولیات میسر نہ ہوتیں تو آج چترال خاص، دروش اور بونی کے سوا باقی علاقوں کے لوگ تعلیم کے زیور سے محروم رہتے اور آج چترال جو پورے صوبے میں کبھی دوسری کبھی تیسری پوزیشن میں ہوتا ہےخواندگی کی شرح کے لحاظ سب سے پیچھے ہوتا۔ خاص کرکے اپر چترال تعلیمی میدان میں سب سے پسماندہ رہ چکا ہوتا۔

اس لیے سابق سٹیٹ ہائی سکول چترال یعنی موجودہ سینٹینئیل ہائی سکول کو پورے چترال کے طلبہ کو تعلیم بہم پہنچانے کا جو اعزاز حاصل ہے اس میں مذکورہ ان دو اقامتی اداروں کا بہت بڑا کردار رہا ہے۔ سٹیٹ بورڈنگ ہاوس چترال سن پچاس کی دھائی میں قائم ہوا تھا یا شاید اس سے بھی پہلے جس میں محدود تعداد کے طلبہ کو داخلہ ملتا تھا اور جس میں رہائیش پذیر لڑکوں کو ملنے والی خوراک کی حالت بھی کوئی قابل رشک نہ تھی۔ تاہم غربت کے اس دور میں یہ بھی بہت بڑی نعمت تھی۔1953 میں اس وقت کے اسماعیلی لیڈرز مرحومین پیرسید منور شاہ آف چوینج اور پیرسید کرم علی شاہ آف ھرچین لاسپور نے ریاست کے وزیر تجارت مرحوم حیدر احمد خان آف بونی کی قیادت میں چترال خاص میں اسماعیلی ہوسٹل کے لیے زمین خریدی۔ خریداری کے موقع پر ریاست کی طرف سے سفید خان تحصیلدار اف کوجو موجود تھے۔ ان بزرگوں کی نگرانی میں اساعلیہ ہوسٹل اور مسافر خانہ کی عمارت تعمیر ہوئی۔ 1956 میں پہلی دفعہ طلباٴ کو داخلہ دیا گیا۔ ریکارڈز کے مطابق گرم چشمہ کے سینئیر ترین ریٹائرڈ استاذ امیر محمد صاحب ان اولین طلباٴ میں سے تھے۔ جہاں اسماعیلی ہوسٹل نے دور دراز وادیوں کے طلبہ کے لیے اقامت اور خوردو نوش کی مفت سہولت بہم پہنچائی وہاں پر اس کے ساتھ ملحق مسافر خانہ اورجانوروں کا اصطبل سودہ سلف خریدنے چترال آنے والے مسافروں اور ان کے بار برداری کے جانوروں کے لیے مفت کا ٹھکانا بھی مہیا کیا۔ اس زمانے کے لحاظ سے یہ مسافر خانہ مسافروں کیلیے ایک نعمت غیر مترقبہ سے کم نہ تھی۔ 1964 میں جب میں مڈل سٹینڈرڈ امتحان کی لیے چترال آیا تو اس ہوسٹل میں ہمیں رہائیش دی گئی۔

میرے والد بزرگوار بحی میرے ساتھ تھے۔ ان کو مسافر خانہ مِیں ٹھہرنے کی جگہ مل گئی اور گھوڑے کو اصطبل میں باندھا گیا۔ پھراسی سال میں نے سٹیٹ ہائی سکول چترال کی نویں جماعت میں داخلہ لیا تو مجھے اس ہوسٹل میں رہائیش کا موقع بھی ملا۔ میرے کلاس فیلوز سید کریم علی شاہ ایڈوکیٹ، سلطان نادر مرحوم اف ریچ نوغور، بلبل بیگ ریٹائرڈ پرنسپل اف بریپ، شہزادہ بہرام ریٹائرڈ سب انسپکٹر پولیس، شیربچہ خان اف چنار مستوج جس نے بعد میں اپنا نام خود عماد الدین رکھا، افضل جان ریٹائرڈ پوسٹماسٹر مستوج، شربت خان ریٹائرڈ پوسٹماسٹر بروک لاسپور، مرحوم گلازارخان اف مردان لوٹکوہ، خدا رحمت ریٹائرڈ ٹیچر لوٹکوہ، صمدگل ریٹائرڈ پرنسپل، مطائب خان ریٹائرڈ وی پی یو بی ایل، سبز علی منیجر، محمد گل مرحوم اف لوٹکوہ، جوان شاہ ریٹائرڈ ٹیچر ریشن، زار خان ریٹائرڈ ٹیچر ارکاری، سید قاسم شاہ ریٹائرڈ ٹیچر بلوغ موردیر اور رحمت غازی خان ریٹائرڈ سیکرٹری لوکل گورنمنٹ میرے ساتھ اس ہوسٹل میں مقیم رہے۔ ان کے علاوہ ہم سے سینئیر طلباٴ میں ژانو خان ریٹائرڈ ٹیچر لون، ڈاکٹراعجازعلی شاہ آف لون، ریٹائرڈ ڈائریکٹراعظم خان نادرہ، ریٹائرڈ صوبیدار گل آباد خان اف پرکوسپ، بلبل آمان ریٹائرڈ پرنسپل بروک لاسپوراورریٹائیرڈ استاد شیرعزیز اف بالیم ہمارے ہوسٹل فیلو رہے ہیں۔

لاسپور سے داد پناہ اور شیراعظم اور گل زرین خان آف پرکوسپ ہم سے جونئیر تھے۔ کچھ دوست اور بھی تھے جن کے نام مجھ سے بھول گئے ہیں۔ بالائی چترال اور لوٹکوہ کے اسماعیلی تعلیم یافتہ طبقے کا نوے فیصد حضرات اس ہوسٹل کے مکین رہے ہیں۔ اس وقت اسماعلیہ ہوسٹل چترال کے سپرنٹنڈنٹ مرحوم کیپٹن امیر خان تھے۔ ان کا تعلق مدکلشٹ سے تھا۔ وہ بڑے قابل آدمی تھے۔ ان کی بڑی روان انگریزی تھی۔ ہمارے ساتھ انگریزی گفتگو کرکے ہماری زبان سدھارنے کی کوشش کیا کرتے۔ ہر وقت کوٹ پتلون کے سوٹ اور ٹائی میں ملبوس رہا کرتے۔ بڑے نفاست پسند شخصیت کے مالک تھے۔ رعب اور دبدبہ والے آدمی تھے۔ انہیں 1965 میں قتل کیا گیا جب وہ اپنی رہائیش گاہ واقع گولدور میں محو خواب تھا۔ ان کی موت اسماعیلی ہوسٹل بلکہ اسماعیلیوں کی تاریخ میں بہت بڑا حادثہ تھی۔ اس تاریک دور کے ایک اعلےِ تعلیم یافتہ شخصیت کا بہیمانہ قتل ناقابل تلافی نقصان تھا جس کا آج بھی مجھے شدید افسوس ہے۔ ان کے قتل کی واردات آج بھی میرے لیے معمہ ہے۔ ان کی شہادت کے بعد چپاڑیو لال صاحب نوازخان ہمارے انچارج ہوئے۔ ہمارے سیشن کے ختم ہونے کے بعد یکے بعد دیگرے مرحوم فدا حسین اور لیاقت علی ہوسٹل کے سپرنٹنڈنٹ رہے۔

علم کے متلاشیوں کی یہ پناہ گاہ 26 سال غریب طلبہ کو اپنی گود میں پالنے کے بعد سن انیس سو بیاسی میں مذہبی انتہا پسندی کا شکار ہوکر اپنی ایک عظیم لائیبریری سمیت نذر آتش ہوا۔اس وقت ہمیں ایسا لگا جیسا کہ اپنا پیارا پیدائشی گھر جل گیا ہو۔ اس میں کیا شک کہ جو مکان ہزاروں غریب طلبہ کے حصول علم کے لیے محفوظ رہائیش اور کھانا پینا مہیا کیا ہو اس کی حیثیت ان طالبان علم کیلیے گھر جیسی ہی ہوتی ہے۔ آج جب بھی اس مقام سے میری گزر ہوتی ہے جہاں یہ ہوسٹل کھڑا تھا تو اس کی زندہ فلم میرے شعور کے پردوں پر جلوہ گرہوتی ہے اور دل سے آہ بھری آواز آتی ہے یہ تو وہی جگہہ ہے گزرے تھے ہم جہاں سے